பிருந்தையாக பிறவியெடுத்த துளசி தேவியின் வரலாறு….

துளசித்தாய் பூமியில் பிருந்தை என்ற பெயரில் பிறந்தாள். அவள் ஜலந்தரன் என்ற அரக்கனை திருமணம் செய்து இருந்தாள். ஜலந்தரன் கடும் தவம் செய்து அதனால் பெற்ற வரத்தால் தேவர்களை கொடுமைப்படுத்தினான். இதனால் தங்களை காப்பாற்றும்படி தேவர்கள் சிவபெருமானிடம் முறையிட்டனர்.இதைத் தொடர்ந்து ஜலந்தரன் சிவனிடம் போரிட வேண்டி கயிலைக்கு சென்று கொண்டிருந்தான். அவன் முன் ஒரு அந்தணர் வேடத்தில் தோன்றிய சிவன் அவனிடம் பேசினார். அப்போது ஜலந்தரன் தன்னால் எதையும் செய்ய முடியும். என்னால் முடியாதது எதுவும் இல்லை என்று இறுமாப்புடன் கூறினான். உடனே அந்தணர் வடிவில் இருந்த சிவபெருமான், தன்கால் பெருவிரலால் மண்ணில் ஒரு வட்ட மிட்டு, அந்த வட்டத்தை பெயர்த்து எடுத்து தலை மீது வைக்க வேண்டும் என்று கூறினார். ஜலந்தரன் அந்த வட்டத்தை பெயர்க்கும் முயற்சியில் ஈடுபட்டான். இரு கரங்களாலும் அதனைப்பெயர்த்து தலைக்கு மேல் தூக்கி தாங்கினான். உடனே அந்தவட்ட சக்கரம் அவன் உடலை இரு கூறுகளாக பிளந்து மீண்டும் அனல் கக்கும் தீப்பிழம்பாக மாறி சிவனின் திருக்கரத்தை சென்றடைந்தது. கயிலைக்குச் சென்ற கணவன்திரும்பி வராததை கண்ட பிருந்தைகவலை அடைந்தாள். அவளது கற்புஎன்று அழிகிறதோ அன்று தான் ஜலந்திரன் அழிவான் என்ற வரம் அவனுக்கு இருந்தது. இதைத் தேவர்கள் மகாவிஷ்ணுவிடம் தெரிவித்தனர்.உடனே அவர் பிருந்தையின் கற்பைச் சோதிக்க ஒரு தவமுனிவர் வடிவில் பிருந்தை முன்சென்றார். அப்போது அவர் ஜலந்தரன் இருகூறாகி இறந்து விட்டதை கூறி அவள் முன் அந்த இரு கூறுகளும் மாயையினால் வரும்படி செய்தார். பிருந்தை தன் கணவன் மீண்டும் உயிர் பெற்று வரவேண் டும் எனமன்றாடி கேட்டுக்கொண் டாள். உடனே திருமால் ஜலந்தரனின் உடற்கூறுகளை ஒன்றாகச் சேர்த்து தான் அந்த உடலில்புகுந்து ஜலந்தரனே மீண்டும் வந்து விட்ட தாக நம்பும்படி செய்தார். தன்னுடன் இருப்பவர் தன் கணவன் இல்லை. மாயையில் வந்தவர் என்பதை அறிந்து கொண்ட பிருந்தை தீயில் புகுந்து உயிர் துறந்தாள். இதனால் மிகவும் மனம் வருந்திய திருமால் பிருந்தை தீக்குளித்த இடத்திலேயே அமர்ந்து இருந்தார். இதை பார்த்த பார்வதி தேவி தனது இடது கை சிறுவிரலில் இருந்து ஒரு விதையை உண்டாக்கி சிவபெருமானிடம் கொடுத்தார்.அதை பிரம்மா பெற்று பிருந்தை இறந்த இடத்தில் ஊன்றி தண்ணீர் வார்த்தார். அங்கே துளசி செடி உண்டாயிற்று. திருமால் அந்தத் துளசியை எடுத்து தன்மேல் அணிந்து மீண்டும் சகஜநிலையை அடைந்தார். இந்தச் சம்பவம் நடந்த இடம் திருவிற்குடி என்றத் திருத்தலமாகும்.