யுபிஐ மூலம் ரூ.2,000-க்கு மேல் செலுத்தினால் கூடுதல் கட்டணமா? சாமானியர்களுக்கு என்ன பாதிப்பு?

அக்டோபர் 15 முதல் வர்த்தகர்களுக்கு கட்டணம்

வரும் அக்டோபர் 15 முதல், கடைகள் மற்றும் வணிக நிறுவனங்களுக்கு ரூ.2,000-க்கு மேல் யுபிஐ (UPI) மூலம் பணம் செலுத்தும் போது 0.4 சதவீத கட்டணம் விதிக்கப்பட உள்ளது. உதாரணமாக, ரூ.10,000-க்கு பொருள் வாங்கினால் ரூ.40 கட்டணமாக வரும். ஆனால், இந்தக் கட்டணம் வாடிக்கையாளரின் கணக்கிலிருந்து பிடிக்கப்படாது. பணத்தைப் பெறும் கடைக்காரரே இந்தக் கட்டணத்தைச் செலுத்த வேண்டும்.

நண்பர்கள் மற்றும் உறவினர்களுக்கு யுபிஐ மூலம் பணம் அனுப்புவதற்கு எந்தக் கட்டணமும் இல்லை. மேலும், கடைகளில் ரூ.2,000 வரை யுபிஐ மூலம் செலுத்துவதற்கும் கூடுதல் கட்டணம் கிடையாது. ரூ.2,000-க்கு மேல் வணிக நிறுவனங்களுக்குச் செய்யப்படும் குறிப்பிட்ட பரிவர்த்தனைகளுக்கு மட்டுமே இந்த கட்டணம் பொருந்தும்.

அரசியல் தலைவர்கள் சுட்டிக்காட்டும் பாதிப்புகள்

இது குறித்து பாமக தலைவர் அன்புமணி ராமதாஸ் வெளியிட்டுள்ள அறிக்கையில், பெரிய தொகை யுபிஐ பரிவர்த்தனைகளுக்கு கட்டணம் வருவதால், வணிகர்கள் பெரிய தொகையை யுபிஐ மூலம் பெறத் தயங்கலாம் என்று தெரிவித்துள்ளார். இதனால் மக்களும் வணிகர்களும் பெரிய தொகைக்கு யுபிஐ பயன்படுத்துவது குறையக்கூடும் என்று அவர் கவலை தெரிவித்துள்ளார்.

அதேபோல காங்கிரஸ் தலைவர் ராகுல் காந்தி சுட்டிக்காட்டுகையில், வாடிக்கையாளரிடம் நேரடியாக கட்டணம் வசூலிக்கப்படவில்லை என்றாலும், கடைக்காரர்களுக்கு வரும் கூடுதல் செலவை ஈடுகட்ட அவர்கள் பொருட்களின் விலையை உயர்த்தக்கூடும் என்று தெரிவித்துள்ளார். இதனால் யுபிஐ கட்டணம் என்று தனியாக வசூலிக்கப்படாவிட்டாலும், பொருட்களின் விலை உயர்வால சாமானிய மக்களுக்கே மறைமுக பாதிப்பு ஏற்படும் என்று அவர் குறிப்பிட்டுள்ளார்.