வெள்ளி அன்று தந்தை இறந்த செய்தியை, ஞாயிறு அன்று உலகக் கோப்பையை வென்ற பிறகு அறிந்த ஸ்பெயின் கேப்டன் உருக்கம்
9-வது பெண்கள் உலகக் கோப்பை கால்பந்து போட்டியின் இறுதி ஆட்டம் இங்கிலாந்து – ஸ்பெயின் அணிகள் இடையே சிட்னியில் ஞாயிறு இரவு நடைபெற்றது. இதில், ஸ்பெயின் அணி 1-0 என்ற கோல் கணக்கில் இங்கிலாந்து அணியை வீழ்த்தி முதல்முறையாக உலகக் கோப்பையை கைப்பற்றியது.
மகளிர் உலகக் கோப்பையை ஸ்பெயின் அணி முதன்முறையாக வெல்ல காரணமாக இருந்தவர் கேப்டன் ஓல்கா கார்மோனா. ஆட்டத்தின் 29-வது நிமிடத்தில் அவர் அழகாக கோல் போட்டு அசத்தினார். அதன் பிறகு கடைசி வரைக்கும் இந்துலாந்து அணியை கோல் போடவிடாமல் தடுத்து ஆட ஸ்பெயின் அணியை அவர் வழிநடத்தினார்.
ஸ்பெயின் அணி கேப்டன் ஓல்கா கார்மோனாவின் தந்தை உடல்நலக்குறைவால் கடந்த வெள்ளிக்கிழமை அன்று உயிரிழந்தார். ஞாயிற்றுக்கிழமை இறுதிப் போட்டி இருந்ததால் அவரிடம் தந்தையின் இறப்பு செய்தியை குடும்பத்தினரும் நண்பர்களும் தெரிவிக்காமல் ரகசியம் காத்தனர். உலகக் கோப்பையை முதன்முறையாக வென்ற மகிழ்ச்சியுடன் கேப்டன் ஓல்கா கார்மோனா இருந்த சில நிமிடங்களில் தந்தை இறந்த அதிர்ச்சி தகவல் அவருக்கு தெரிவிக்கப்பட்டது.
“தனித்துவமான ஒன்றை அடைய நீங்கள் எனக்கு பலத்தை அளித்துள்ளார்கள் என்பதை நான் அறிவேன்” என்றும், “இன்றிரவு என்னை நீங்கள் பார்த்துக் கொண்டிருக்கிறீர்கள். என்னைப் பற்றி நீங்கள் பெருமைப்படுகிறீர்கள் என எனக்குத் தெரியும். அப்பா, நிம்மதியாக இருங்கள்.” என எக்ஸ் சமூக வலைதளத்தில் ஓல்கா கார்மோனா உருக்கமாக குறிப்பிட்டுள்ளார்.